Katoneng-Katoneng Kayu Mbulak

oleh: Simson Gintings

Enggo dage dage
Bapa, nande, turang si la erpilihen si la erndobahen
Uga nari kal nge ningku nuri-nuri man bandu kerina
Adi enggo bagenda kal rehna sekerajangenta
Reh dekahna reh ngesekesna bagi gelang perdit
Menam-menam kita lanai ngasup mersansa
Bapa, nande, turang kerina si megi-megi

Ernolih-nolih kal kita rate mesui
Beratna lanai bo langlang
Uga kal nge ndia pertubuh paduka ndube maka bage kal laguna
Ngarap kal kita ia banci jadi lanam erjujung
Inganta ciocio bas wari lego ras wari perudan
Ingan merga si lima ras beru si lima ngadu-ngadu
Ingan anak si nguda nungkun kerna wari si pepagi
Emaka sahun surung me sekali enda kita ngadi rate mesui ndai
Bage kal nina ukurta kerina asum e, nande o nandeku

Tapi uga kel nge ningku gundari nuri-nuri man bandu
Ku pekeri kin pe soraku lanai bo banci seh ku cupingna
Sora gaji si gedang tajina janah erndilap
Enggo ersiung ras sora kayu mbulak
Erikiteken paduka si gedang mbestang
Si teberita merawa la mbiar kai pe
Enggo ngeluken sura-surata ndube
Erpenulak kal ia nandangi ajar si mehuli
Bapa, nande … nande

Ertambah-tambahna kal menda ateta mesui
Seh matanta natap
Enggo mbelang kal ibahan paduka inganta natap-natap
Enggo salang mesai kal kerangen merga si lima ituhtuhi
Adi sitatap kepultaken nari seh ku kesunduten
Lanai kal lit inganta kiranting ndube agi kakana
Ningku suari berngi nderkuh sisada

Emaka ipalu menda gendang sarune
Labo katoneng-katoneng masu-masu
Tapi katoneng-katoneng kayu mbulak
Dalenta niar-niar taneh kemulihen alu iluh erdire-dire
Janahta landek ersembah seh ku taneh
Nembah mungkuk man Dibata
Inganta si tuhu-tuhu nuriken ate mesui
Nande o nandengku

sumber : Sapo Holland